Uchrashuvda “Yaponiya ta’lim tajribasiga asoslangan ta’lim va axloqiy tarbiya hamkorligi” mavzusida fikr almashilib, Yaponiyaning ilg‘or ta’lim tajribalarini O‘zbekistonning milliy qadriyatlari, oila va mahalla an’analari bilan uyg‘unlashtirish masalalari muhokama qilindi.

Muloqot davomida ta’lim va shaxs tarbiyasining uzviyligi, Tokkatsu orqali maktab hayotida tarbiya, axloqiy ta’lim metodologiyasi, pedagoglarning kasbiy mahoratini oshirish, maktab madaniyati va ta’lim muhiti hamda WorldClassroom orqali xalqaro almashinuv kabi ustuvor yo‘nalishlarga alohida e’tibor qaratildi.

Shuningdek, ilg‘or tajribalarni Namangan viloyatidagi 5–10 ta pilot maktabda bosqichma-bosqich sinovdan o‘tkazish, pedagoglar jamoasini shakllantirish, ta’lim va maktab muhitidagi o‘zgarishlarni baholash hamda muvaffaqiyatli tajribalarni keng ommalashtirish yuzasidan takliflar ilgari surildi.

Mazkur uchrashuv O‘zbekiston va Yaponiya o‘rtasidagi ta’lim sohasidagi hamkorlikni yanada mustahkamlash, ilg‘or xalqaro tajribalarni milliy qadriyatlarimiz bilan uyg‘unlashtirgan holda zamonaviy va barqaror ta’lim-tarbiya modelini shakllantirish yo‘lidagi muhim qadam bo‘ldi.