Institut Kengashining kengaytirilgan majlisi bo‘lib o‘tdi

Namangan davlat pedagogika institutida Kengashning 2026/2027-o‘quv yilidagi 3-sonli kengaytirilgan majlisi bo‘lib o‘tdi. Unda institut rahbariyati, Kengash a’zolari, tarkibiy tuzilmalar mas’ullari hamda professor-o‘qituvchilar ishtirok etdi.

Majlisning dastlabki qismida institutdagi tegishli lavozimlarga tayinlangan xodimlar jamoaga tanishtirildi. Ularning kasbiy faoliyati, ish tajribasi va zimmasiga yuklatilgan vazifalar haqida ma’lumot berildi. Yangi lavozimlarda faoliyat boshlayotgan xodimlarga institutning ta’lim sifati, ilmiy faoliyat va tashkiliy jarayonlar bilan bog‘liq ustuvor vazifalarini amalga oshirishda mas’uliyat bilan ishlash zarurligi qayd etildi.

Shundan so‘ng institutda pedagogik faoliyatini boshlayotgan yangi professor-o‘qituvchilar bilan tanishuv o‘tkazildi. Nomzodlarning mutaxassisligi, pedagogik tajribasi va ilmiy faoliyatiga oid ma’lumotlar Kengash a’zolariga taqdim etildi. Ularni professor-o‘qituvchilar tarkibiga qabul qilish bilan bog‘liq masalalar belgilangan tartibda ko‘rib chiqilib, ovoz berish jarayoni tashkil etildi.

Majlisda ilmiy darajaga erishgan professor-o‘qituvchiga diplom topshirish marosimi ham bo‘lib o‘tdi. Institut rahbariyati tomonidan uning ilmiy izlanishlari va erishgan natijasi e’tirof etilib, kelgusi ilmiy-pedagogik faoliyatiga muvaffaqiyat tilandi. Bu kabi yutuqlar institut ilmiy salohiyatini oshirish hamda yosh tadqiqotchilarni izlanishga rag‘batlantirishda muhim ahamiyatga ega ekani ta’kidlandi.

Kengash majlisining ushbu qismi jamoa tarkibidagi yangiliklar bilan tanishish, yangi pedagoglarning faoliyatini ko‘rib chiqish va professor-o‘qituvchilarning ilmiy yutuqlarini e’tirof etishga bag‘ishlandi. Shundan so‘ng yig‘ilish kun tartibiga kiritilgan institut faoliyatiga oid masalalar muhokamasi bilan davom etdi.