Namangan davlat pedagogika institutida yoshlar o‘rtasida kitobxonlik madaniyatini keng targ‘ib qilish, mutolaa qilingan badiiy asarlar yuzasidan bilim va dunyoqarashni mustahkamlash, mantiqiy fikrlash hamda intellektual salohiyatni rivojlantirish maqsadida “Bir haftada bir kitob” loyihasi koordinatori O. Madaminova boshchiligida Zakovat intellektual o‘yini tashkil etildi.

 Mazkur intellektual o‘yin davomida hafta mobaynida o‘qilgan badiiy asarlar asosida tuzilgan qiziqarli va mantiqiy savollar o‘rtaga tashlandi. Ishtirokchilar o‘z bilimlari, zukkoligi va tezkor fikrlash qobiliyatlarini namoyon etib, o‘zaro bellashdilar.

Musobaqada jami 28 ta jamoa ishtirok etib, bilim va tafakkur maydonida o‘zaro kuch sinashdi.

🏆 Birinchi Zakovat musobaqamiz yakunlariga ko‘ra, g‘oliblar quyidagicha aniqlandi:

🥇 1-o‘rin — “Ko‘hinur” jamoasi

🥈 2-o‘rin — “O‘zbegim qizlari” jamoasi

🥉 3-o‘rin — “Intellekt” jamoasi

🏅 4-o‘rin — “Logos” jamoasi

🏅 5-o‘rin — “Avitsenna” jamoasi

 Tadbirning ochilish marosimida Yoshlar bilan ishlash, ma’naviyat va ma’rifat bo‘limi boshlig‘i M. Nabijonov hamda xotin-qizlar masalalari bo‘yicha rektor maslahatchisi G. Dexkonova kirish so‘zi bilan ishtirok etib, kitob mutolaasining yoshlar kamolotidagi o‘rni, badiiy adabiyotning inson tafakkuri va dunyoqarashini shakllantirishdagi ahamiyati haqida alohida ta’kidlab o‘tdilar.

 Tadbirni tashkil etish va o‘tkazishda Yoshlar masalalari, ma’naviyat va ma’rifat bo‘limi tyutorlari O. Madaminova, shuningdek, M. Mahmudova hamda A. Rahmonazarova faol ishtirok etdilar.

 Ta’kidlash joizki, “Bir haftada bir kitob” loyihasi doirasida har hafta o‘qilgan badiiy asarlar asosida tashkil etiladigan bunday intellektual o‘yinlar yoshlarning mutolaaga bo‘lgan qiziqishini yanada oshirish, o‘qilgan asarlarni chuqur tahlil qilish, mustaqil va jamoaviy fikrlash ko‘nikmalarini rivojlantirishga xizmat qiladi.

 Zero, kitob o‘qigan yosh — fikrlaydigan yosh, fikrlaydigan yosh esa kelajak bunyodkoridir!

Barcha ishtirokchilar va g‘olib jamoalarni samimiy tabriklaymiz! Kelgusi bellashuvlarda ham barchaga omad tilaymiz!