Har qanday xalqning tarixida shunday sanalar bo‘ladiki, ular shunchaki tantana bilan cheklanmay, bosib o‘tilgan taraqqiyot yo‘lining falsafiy mohiyatini teran anglash hamda kelajak ufqlarini belgilashni talab etadi. Vatanimiz mustaqilligining 35 yillik shonli dovoni — davlatchiligimiz poydevorini mustahkamlash bilan birga, jamiyat tafakkurida yuz bergan tub sifat o‘zgarishlarini sarhisob qilish uchun yuksak ma’naviy minbardir.

Muhtaram Prezidentimiz Shavkat Mirziyoyev ta’kidlaganlaridek: «Biz Yangi O‘zbekistonni barpo etishda eng avvalo xalqimizning ma’naviy yuksalishi, yoshlarimizning zamonaviy ilm-fan va kasb-hunarlarni puxta egallashiga tayanamiz. Zotan, taraqqiyotning asosi, mamlakatni qudratli qiladigan kuch — bu ilm-ma’rifat va inson kapitalidir». Ushbu qutlug‘ ayyom arafasida ilgari surilayotgan ezgu g‘oyalar zamirida inson qadrini yuksaltirish, milliy birlikni mustahkamlash va Yangi O‘zbekiston poydevorini intellektual salohiyatli avlod qo‘li bilan bunyod etish maqsadi mujassamdir. Chinakam mustaqillik — bu xalqning tafakkur erkinligi va ma’rifiy qudrati bilan chambarchas bog‘liqdir.

Davlatimiz rahbarining «Najot — ta’limda, najot — tarbiyada, najot — bilimda. Chunki barcha ezgu maqsadlarga faqat ma’rifat orqali erishiladi», degan konseptual g‘oyasi bugun sohadagi tub burilishlarning harakatlantiruvchi kuchiga aylandi. Keyingi yillarda yurtimizda barcha sohalar qatori ta’lim tizimida ham misli ko‘rilmagan islohotlar amalga oshirilmoqda. «Pedagogning maqomi to‘g‘risida»gi qonunning qabul qilinishi o‘qituvchi sha’ni va nufuzini davlat himoyasiga oldi. Oliy ta’lim muassasalariga berilgan akademik hamda moliyaviy mustaqillik, kredit-modul tizimi va kompetensiyaviy yondashuvning joriy etilishi talabalarda mustaqil izlanish madaniyatini shakllantirmoqda.

Prezidentimiz tomonidan Yangi O‘zbekistonning Uchinchi Renessans poydevorini yaratish vazifasi qo‘yilgan bugungi davrda pedagog kadrlar tayyorlash maskanlari zimmasiga ikki karra yuksak mas’uliyat tushadi. Maktab va oliygohni o‘zaro mustahkam bog‘lovchi pedagogik klaster tamoyillari asosida tayyorlanayotgan bo‘lajak muallim nafaqat o‘z fanining chuqur bilimdoni, balki milliy g‘oya va umuminsoniy qadriyatlarni yoshlar qalbiga singdiruvchi ma’naviy yetakchi bo‘lishi lozim. Axborot oqimi shiddatli tus olgan davrda yoshlar ongida yot mafkuralarga qarshi mustahkam mafkuraviy immunitetni shakllantirish, ularni tanqidiy va tahliliy fikrlashga o‘rgatish har bir pedagogning muqaddas burchidir.

35 yillik dovonda turib kelajakka boqar ekanmiz, mamlakatimizdagi ma’rifiy islohotlar institutimiz jamoasi, fidoyi professor-o‘qituvchilarimiz va iqtidorli talabalarimiz oldiga yangi, yanada yuksak marralarni qo‘ymoqda. Yangi O‘zbekistonning ravnaqi va xalqimizning intellektual yuksalishi yo‘lida sifatli ta’lim berish, ilmiy salohiyatni oshirish hamda davrimiz talablariga to‘la javob beradigan raqobatbardosh kadrlarni tayyorlash biz uchun eng oliy saodat va sharafli mas’uliyat bo‘lib qoladi.

Fursatdan foydalanib, butun xalqimizni, aziz ustoz-murabbiylarimizni, hamkasblarimiz va qadrli talaba-yoshlarimizni eng ulug‘, eng aziz ayyom — O‘zbekiston Respublikasi Davlat mustaqilligining 35 yillik shodiyonasi hamda kirib kelayotgan yangi o‘quv yili bilan chin qalbimdan samimiy muborakbod etaman! Barchangizga sihat-salomatlik, oilaviy baxt-saodat, xonadonlaringizga tinchlik va fayzu baraka tilayman. Ona Vatanimiz ravnaqi, yosh avlod kamoli yo‘lidagi sharafli va mas’uliyatli faoliyatingizda ulkan zafarlar doimo yor bo‘lsin! Mustaqilligimiz abadiy, taraqqiyotimiz bardavom bo‘lsin!

Abdullayev Akmal Nasriddinovich