Festival Qoraqalpoq davlat universitetida tashkil etilgan tantanali ochilish marosimi bilan boshlandi. Unda ishtirokchilarga festivalning mazmun-mohiyati, asosiy yo‘nalishlari hamda yoshlar o‘rtasida bilim, madaniyat va o‘zaro hamkorlikni rivojlantirishga qaratilgan ustuvor vazifalar haqida batafsil ma’lumotlar berildi.

Festival dasturi doirasida ishtirokchilar, jumladan NamDPI talabalari Mo‘ynoq tumaniga tashrif buyurib, Kemalar qabristoni hamda Orol dengizi tarixi muzeyi bilan yaqindan tanishdilar. Mazkur tashrif yoshlarning ekologik tafakkurini kengaytirish, Orol dengizi hududida yuzaga kelgan muammolar va ularning oqibatlarini chuqur anglashga xizmat qildi.

Shuningdek, festival doirasida Qoraqalpoq davlat universiteti hududida “Sumalak sayli”, “Zakovat Quiz” intellektual o‘yini hamda madaniy-ma’rifiy kecha yuqori saviyada tashkil etildi. Bundan tashqari, festival doirasida NamDPI magistranti “Mirzo Ulug‘bek vorislari” respublika tanlovining final bosqichida faol ishtirok etdi.

Festival yakuniy bosqichlarida NamDPI talabalari oliy ta’lim muassasasida tashkil etilgan Navro‘z sayllarida ham faol qatnashib, milliy qadriyatlar, urf-odatlar va an’analarni targ‘ib etishda munosib hissa qo‘shdilar.