Maktabgacha ta'lim tizimining asosiy maqsadlaridan biri bolalarning shaxsiy imkoniyatlari va qobiliyatlarini e'tiborga olib, ularni har tomonlama rivojlantirishga qaratilgan ta'limni ta'minlashdir. Bu jarayonda bolalarda erta yoshdan matematik tushunchalarni mustaqil ravishda shakllantirish dolzarb vazifa sanaladi.

Namangan davlat pedagogika instituti Maktabgacha ta'lim kafedrasi qoshidagi "Ijodkor qizlar" to'garagi faoliyati ana shu maqsadga xizmat qiladi. Mazkur to'garakning mashg'ulotlari kafedra katta o'qituvchisi N. Ismailova boshchiligida olib borilib, maktabgacha yoshdagi bolalarda elementar matematika mashg'ulotlarini tashkil etish metodikasi o'rgatilmoqda.

To'garakda:

• Didaktik materiallardan samarali foydalanish, jumladan, Kayi Sati, Kyuzener tayoqchalari, va Zoltan De’nesh bloklari bilan ishlash ko'nikmalari shakllantiriladi.
• STEAM texnologiyalari asosida rang, shakl, va o'lcham kabi tushunchalarni tushunish orqali bolalarning kuzatuvchanligi, modellashtirish qobiliyati va tahlil qilish malakalari rivojlantiriladi.
• Matematik terminlar bilan lug'at boyitish va arifmetik masalalarni yechish usullari o'rgatiladi.

Mashg'ulot davomida ishtirokchilar nazariy bilimlarini amaliyotda sinab, bolalarning faol bilish jarayonini tashkil etish bo'yicha zarur usullarni o'zlashtirdilar. Ular bola shaxsini har tomonlama rivojlantirishga qaratilgan metodik qo'llanmalar bilan tanishib, qiziqtirgan savollariga javob topdilar.

Mazkur to'garak orqali bo'lajak pedagoglarning maktabgacha ta'lim jarayonini innovatsion yondashuvlar asosida tashkil etish malakalari yanada takomillashmoqda.

❮ ❯